Cjasarse (2024)

Il 23^Congrès Anuâl de Societât Sientifiche e Tecnologjiche Furlane si è davuelzût Sabide ai 14 di Dicembar dal 2024, a Cjasarse, te Sale dal Consei Comunâl di Palaç di Burovich de Zmajevich, sede dal Comun, dulà che, par partecipâ al event, si è dât dongje un public numerôs.

Il Congrès al è tacât cu la presentazion di bande dal prof. Antonino Morassi, president de SSTeF, e cui salûts dal Comun, puartâts dal vicesindic Ermes Spagnol.

La Lectio Magistralis, une vore preseade di ducj i presints, e je stade tignude dal Inz. Giovanni Battista Colussi, President de “Colussi Ermes”, sul teme De tradizion ae inovazion: tecnichis inovativis progjetadis su misure pal lavaç industriâl dai aliments e des atrezaduris dopradis in cjamp alimentâr e farmaceutic. L’Inz. Colussi, che, pes sôs invenzions e progjetazions inovativis al à vude conferide de Universitât dal Friûl la Lauree Magjistrâl Honoris Causa in Inzegnarie Mecaniche, te sô prolusion al Congrès, al à ilustrât cualchidune des tantis soluzions inovativis e invenzions che al à progjetât tal cjamp dal lavaç industriâl.

Cetant preseâts a son stâts ancje i contribûts puartâts daspò de prolusion, te sezion des Comunicazions, di Gianluigi Gallenti, Matteo Carzedda, Luca Iseppi e Sandro Sillani; Giulia Genuzio; Silla Stel, seguide dal video curt di Giulia Matellon; Francesco Pascoli; Franco Rosa; Rino Gubiani; Enrico Maiero; Lorenzo Marcolini; Sandro Fabbro.